PRM: Dåarjoe prosjektide jïh evtiedimmiebarkose maanagïertesne

Saemiedigkie dåarjoem vadta maanagïertide mah eadtjohkelaakan saemien gïelem maanagïertesne nænnoestieh jïh evtiedieh. Saemiedigkieraerie lea 2 129 400 kråvnah dåarjojne dåårjeme prosjektide jïh evtiedimmiebarkose maanagïertine, joekedamme 10 prosjektide goeven 2019.

Ođas | Almmuhuvvon , ođasmahtton

Saemiedigkie ohtsemh åadtjoeji jaepien 2019 vielie goh njieljie millijovnh kråvnaj åvteste dåarjoeöörnegese Dåarjoe prosjektide jïh evtiedimmiebarkose maanagïertine. Ulmie daejnie dåarjoeöörneginie lea jolle kvaliteete saemien gïelesne jïh kultuvrebarkosne maanagïertine. 2019 saemiedigkieraerie prioriteradi gïelebiesieprosjekth, voenges evtiedimmieprosjekth, tseegkeme orre saemien maanagïertefaalenassijste jïh råajvarimmieh mah gïelebarkoem prosjekti tjïrrh goh «gïeletjiehpije».

– NBS 2016:18 Vaajmoegïele jeahta saemien maanagïerth leah dïhte vihkielommes aktegsråajvarimmie juktie gorredidh, vaarjelidh jïh jieliehtidh saemien gïelh. Maanah mah eah saemien maehtieh, men edtjieh dam lïeredh, jïh maanah mah saemien maehtieh, edtjieh gïelefaalenassem maanagïertesne åadtjodh mij lea dej gïelenjeaptjan sjïehtedamme, saemiedigkieraerie Mikkel Eskil Mikkelsen jeahta.

Dejstie prosjektijste mah dåarjoem åådtjeme leah Læringsverkstedet maanagïerte Ekornrud Jessheimesne, mij 150 000 kråvnah dåarjojne åådtje gïelebiesieprosjektese, gusnie ulmie lea dåarjodh, vaarjelidh jïh evtiedidh saemien gïelh viehkine ietniengïelelohkehtæjjeste. Dah sijhtieh saemien gïelelïerehtimmine jïh bievnieminie saemien kultuvreste jïh aerpievuekeste öörnegen mietie barkedh abpe maanagïertejaepiem, guktie akte bielie maanagïerten barkoste sjædta båetijen aejkien.

Akte jeatjah prosjekte mij dåarjoem åådtje lea Heggelia/Noraførr maanagïerte Målselvesne. Dah 122.500 kråvnah dåarjojne åådtje akten evtiedimmieprosjektese mij edtja saemien gïelem jïh kultuvrem vaarjelidh jïh evtiedidh dejtie saemien maanide maanagïertesne jïh daan daajroen bïjre bievnedh jeatjah maanide jïh barkijidie maanagïertesne.

– Saemiedigkie sæjhta sov maanagïertepolitihkine sjïehteladtedh ihke maanagïerth vuekine åtnose vaeltieh nænnoes gïelemaallh mah leah sjïehtedamme fïereguhten maanagïerten voenges daerpiesvoetese jïh gïelenjeaptjan.

Saemien maanagïerte 300 000 kråvnah dåarjojne åådtje gïeleskreejremeprosjektese gïellačeahppi  (gïeletjiehpije) gusnie ulmie lea maanide aktem hijven saemien gïeleevtiedimmiem maanagïertesne gorredidh.

– Prosjekth goh gïeletjiehpijh lea naakede maam prioriteerede dan åvteste sïjhtebe hoksedh saemien gïelh leah stïeresne maanagïertesne vielie goh dej luvnie mah desnie biejjieladtje berkieh. Destie maanagïerth mieriem åadtjoeh gïelebarkojne gïehtelidh jïh vyörtegs vierhtine sjædta maanagïertide, Mikkelsen jeahta.

Daan jaepien joekedimmine saemiedigkieraerie aaj prioriteradi orre maanagïertefaalenassem tseegkedh. Altan tjïelte 300 000 kråvnah dåarjojne åådtje juktie orre saemien maanagïertem tseegkedh, Guovddáš mánáidgárdi. Dah sijhtieh saemien maanagïertefaalenassem tjïeltesne nænnoestidh jïh tjïelke saemien maanagïertem tseegkedh tjïelten tjïrrh.

– Daate råajvarimmie ellies noerhtesaemien maanagïertefaalenassem vadta, mij lea joekoen positijve jïh vihkeles saemien siebriedahkese jïh vaarjelimmien jïh evtiedimmien gaavhtan saemien gïelijste, Mikkelsen jeahta.

Jis gihtjehtimmiem sïjhth gaskesadth  saemiedigkieraeriem Mikkel Eskil Mikkelsen, 917 42 161, mikkel.eskil.mikkelsen@samediggi.no

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!